Stofnandinn

FRUMKVÖÐULL

Aðalstofnandi Vísis hf, Páll H. Pálsson, fæddist í Reykjavík árið 1932. Hann fluttist nokkurra vikna gamall til Þingeyrar, þar sem hann ólst upp með foreldrum sínum og þremur systkinum. Foreldrar hans voru þau Páll Jónsson og Jóhanna Daðey Gísladóttir. Fjölskyldan bjó í hjarta þorpsins að Aðalstræti 4. Faðirinn, Páll, átti bátana Fjölni og Hilmi og fórst með Hilmi í Faxaflóa árið 1943. Jóhanna Daðey gerði Fjölni áfram út til síldveiða og fiskflutninga í stríðinu allt þar til hann sökk, er hann lenti í árekstri við enskt póstskip í lok stríðsins, í mars 1945.

Páll H. Pálsson var ellefu ára gamall þegar hann fór fyrst á sjóinn sem léttadrengur á Fjölni. Þar á eftir stundaði hann sjómennsku á ýmsum bátum og togurum þar til hann fór í Stýrimannaskólann. Þaðan útskrifaðist hann 1953. Það ár keypti hann ásamt fleirum 100 tonna bát, Ágúst Þórarinsson frá Stykkishólmi. Fékk hann nafnið Fjölnir ÍS 177 og var gerður út á línuveiðar frá Þingeyri.

Á skólaárunum fyrir sunnan kynnist hann Margréti Sighvatsdóttur. Þau giftu sig á sjómannadaginn árið 1955 og hófu búskap í Keflavík. Fagna þau hjónin því 50 ára brúðkaupsafmæli sínu sama ár og fyrirtæki þeirra heldur upp á 40 ára starfsafmæli sitt. Börn Páls og Margrétar urðu sex. Þau eru Margrét, Páll Jóhann, Pétur Hafsteinn, Kristín Elísabet, Svanhvít  Daðey og Sólný Ingibjörg.                         

Eftir Stýrimannaskólann gerðist Páll stýrimaður á m/b Voninni frá Keflavík og síðar á m/b Hilmi. Því næst varð hann skipstjóri á m/b Nonna og þar á eftir á m/b Bárunni. Árið 1963 keypti Páll m/b Farsæl og var með hann á línu- og humarveiðum. Árið 1964 keypti hann, ásamt Kristmundi Finnbogasyni og Ásgeiri Lúðvíkssyni, vélbátinn Vísi KE 70 og fiskverkunarhúsið Sævík í Grindavík og flutti þangað með fjölskyldu sína í nóvember árið 1965. Félagið Vísir sf. var svo formlega stofnað 1. desember 1965.

Páll var forstjóri félagsins allt til ársins 2000 og enn þann dag í dag er hann formaður stjórnar Vísis. Hann var sæmdur heiðursmerki hinnar íslensku fálkaorðu árið 2001, fyrir störf sín að sjávarútvegi og fiskvinnslu.